Lavrov: Nuk do të shkelet e drejta ndërkombëtare për shkak të Kosovës

Ministri i Jashtëm i Rusisë, Sergei Lavrov, të martën mbërrin në Slloveni, ku të mërkurën do të marrë pjesë në takimin e treshes së Bashkimit Evropian dhe Federatës Ruse. Para nisjes drejt Sllovenisë Lavrov ka deklaruar se Kosova nuk mund të jetë rast i veçantë në botë, për shkak të të cilit do të shkelej e drejta ndërkombëtare.
Sipas tij, mbështetësit e pavarësisë së Kosovës e konsiderojnë Kosovën si rast unik dhe për këtë shkak sipas tyre, “mund të shkelet e drejta ndërkombëtare dhe se të gjithë të tjerët duhet të pajtohen me këtë gjë”.

"Kjo nuk do të ndodhë", ka thënë Lavrov. Sipas tij, shumëkush i kupton rreziqet dhe kërcënimet – kupton se kjo gjë do të shkaktonte reagimin zinxhiror në shumë pjesë të Evropës dhe të botës, mirëpo llogarisin se do t’ia dalin disi – ndërsa një plan të qartë të aktiviteteve, në rast të reaksioneve të tilla, askush nuk mund ta propozojë.

Shefi i diplomacisë ruse ka thënë se për zgjidhjen e statusit të Kosovës po shfrytëzohen standarde të dyfishta. "Thonë se serbët dhe shqiptarët nuk mund të jetojnë së bashku dhe se për këtë shkak duhet ndarë Kosovën nga Serbia, mirëpo në Kosovë ka serbë”, ka thënë ai. "Si do të jetë me serbët në Ksoovë? Në këto pyetje nuk ka përgjigje. Absolutisht bëhet fjalë për standard të dyfishtë”, ka shtuar ai.

Ministria e Jashtme e Sllovenisë njoftoi se takimi i Lavrovit me Dimitrij Rupel, Javier Solana dhe Benita Ferrero-Valdner, do t'i kushtohet çështjes së Kosovës, procesit paqësor në Lindjen e Mesme, si dhe marrëdhënieve midis Rusisë dhe Bashkimit Evropian.