Turqia ndan 100 milionë euro për ndërtimin e një Universiteti në Prishtinë

Prishtinë, 11 janar - Turqia është e gatshme të mbështesë Prishtinën në ruajtjen e trashëgimisë kulturore, ndërsa qeveria e saj ka ndarë rreth 100 milionë euro për ndërtimin e Universitetit Teknik të Evropës Juglindore, tha sot shefi i zyrës së Turqisë në Prishtinë Mustafa Sarniç pas takimit me kryetarin e ri të Prishtinës, Isa Mustafën. Kryetari i Komunës se Prishtinës tha se me shefin e zyrës turke në Prishtinë ka diskutuar për ndërtimin e Universitetit të Evropës Juglindore në Prishtinë, i cili do të financohet nga qeveria turke. "Diskutuam edhe për bashkëpunim ekonomik në mes të dy vendeve. Shefi i zyrës turke më ftojë që të vizitoj shtetin turk, meqenëse kryeqyteti ynë është i binjakëzuar më Ankaranë", tha Mustafa. Kjo vizitë tha Mustafa do të përdorej për shkëmbimin e përvojave të përbashkëta lidhur me zhvillimin e mëtutjeshëm. Mustafa tha se shprehu gatishmërinë që të ofrojë të gjitha mundësitë e bashkëpunimit, regjenerimit dhe ndërtimit të objekteve që paraqesin një të kaluare të përbashkët historike. "Diskutuam edhe për pjesën e vjetër të kryeqytetit, për të cilën ne jemi duke përgatitur planin rregullues urbanistik, e për të cilën ne do të kemi kujdes të veçantë, në mënyrë që të ruhet kultura jonë e përbashkët", tha Mustafa. Duke ju përgjigjur interesimit të shefit turke rreth ndarjes se 250 hektarëve, që nevojiten për ndërtimin e Universitetit të Evropës Juglindore, Isa Mustafa tha se për këtë çështje do të diskutojë edhe me nivelin qendror të qeverisjes dhe Agjencinë Kosovare të Mirëbesimit (AKM), e cila aktualisht menaxhon me pronën publike në Kosovë. Ndërkaq, shefi i Zyrës turke në Prishtinë Mustafa Sarniç tha se gjatë takimit me kryetarin Isa Mustafa kanë këmbyer edhe ide lidhur me bashkëpunimin kulturor, ekonomik dhe të aktiviteteve humane të qeverisjes lokale. "Kam shpjeguar se ndërmarrjet e Turqisë, që merren më ndërtimtari. Infrastrukturë dhe bankari mund të krijojnë mundësi të mira në Prishtinë përmes investimeve. Po ashtu i kam theksuar se Turqia është e gatshme të mbështes Prishtinën në ruajtjen e trashëgimisë kulturore", tha Sarniç. Shefi i Zyrës turke tha se qeveria e Turqisë ka ndarë rreth 100 milionë euro për ndërtimin e Universitetit Teknik të Evropës Juglindore. "Eshtë një veçori jona që përfaqësia jonë politike në Prishtinë është e para që ka blerë truall në Prishtinë dhe në një të ardhme të afërt do të fillojmë edhe ndërtimin e përfaqësisë sonë këtu", tha diplomati turk.