Ahmeti: Zgjedhje në korrik ose shtator 2008

Kryetari i BDI-së, Ali Ahmeti, në një intervistë për televizionin Kanal 5 deklaroi se në Maqedoni duhet të organizohen zgjedhje të parakohshme, pasi që të merret ftesa pozitive në Samitin e NATO-s.
“Unë mendoj që nëse ne kemi ftesë pozitive në Samitin e NATO-s në Bukuresht krijohen kushte të mira për zgjedhje të parakohshme. Por, jo zgjedhje lokale dhe presidenciale, sepse tani situata është mjaft e ngarkuar”, theksoi Ahmeti.

Sipas tij, muajt më të pranueshëm për organizimin e zgjedhjeve të parakohshme janë korriku apo shtatori i vitit 2008. Ai nuk përjashton mundësinë për koalicionin me VMRO-DPMNE-në e kryeministrit Nikolla Gruevski.

“Unë sigurisht që e thash më herët, unë pranoj të jem në një qeveri me Nikolla Gruevski, pasi të dalim në zgjedhje, qofshin të parakohshme ose të rregullta. Mbetem me qëndrimin parimor, sepse është në të mirë të vendit, partitë fitimtare duhet ta respektojnë vullnetin e shumicës së qytetarëve dhe ta marrin përgjegjësinë ato”, theksoi kryetari i BDI-së, Ali Ahmeti. /INA/