Basha: Pavarësia e Kosovës, fundi i një procesi të nisur në vitin 1999

E ardhmja e Shqipërisë dhe Kosovës, është integrimi në Bashkimin Evropian dhe NATO, ka deklaruar ministri i Punëve të Jashtme të Shqipërisë, Lulzim Basha. Në një intervistë dhënë në studion e BBC-së në Londër, Basha deklaroi se pavarësia e Kosovës është një garanci për stabilitet në gjithë rajonin.
I pyetur se “çfarë ndodh me Kosovën ditën e hënë, nëse të dielën Parlamenti i Kosovës shpall pavarësinë?” - ministri Basha deklaroi se: “Shpallja e pavarësisë do të ishte fundi i një procesi të nisur me bombardimet e NATO-s në mars të vitit 1999 mbi ish-Jugosllavi”.

Sipas tij rasti i Kosovës është rast unik dhe se shpreson që Evropa do të flasë me një zë për pavarësinë. I pyetur nëse Serbia mund t’i bëjë bllokadë ekonomike Kosovës, nëse ajo shpall pavarësinë, ministri Basha deklaroi se: “Kjo bllokadë mund të dëmtojë vetëm Serbinë pasi Kosova është në kufi me Shqipërinë dhe Maqedoninë të cilat janë të angazhuara ta ndihmojnë shtetin e ri”.

I pyetur nëse bëhet fjalë për Shqipërinë e madhe, Basha deklaroi se: “E ardhmja e të dy vendeve është integrimi evropian”. /news24/