Welt: Misioni i BE-së në Kosovë do të jetë më i madh sesa ai i paralajmëruar

Bashkimi Evropian dëshiron që, në kuadër të misionit të planifikuar, në Kosovë të dërgojë më shumë policë, gjyqtarë dhe doganierë sesa që është parashikuar fillimisht, ka bërë të ditur të enjten gazeta gjermane "Welt".
Duke cituar fjalët e diplomatëve të lartë evropianë, “Welt” shkruan se Unioni planifikon që në territorin e Kosovës të dërgojë 2.200 policë, gjyqtarë, zyrtarë doganor dhe avokatë, në vend të 1.800-2.000, siç ishte parashikuar fillimisht.

Diplomatët kanë thënë për gazetën gjermane se deri tek zgjerimi i misionit ka ardhur për shkak të nevojës për forca speciale policore, të cilat do të mund të vepronin shpejt, pasi që Kosova të shpall pavarësinë nga Serbia, ka transmetuar agjencia e lajmeve Reuters.

"Welt" gjithashtu ka shkruar se BE tenton të rekrutojë gjyqtarë dhe oficerë doganorë të mjaftueshëm për misionin në Kosovë, si dhe se Gjermania ka ofruar të dërgojë 150-200 njerëz, që është kontributi më i madh për misionin, pas Italisë.