Marseille dhe Werder shënojnë fitore bindëse

Ekipi i shqiptarit Lorik Cana, ka shënuar fitore prej 3-0 në ndeshjen e parë të Kupës UEFA, si nikoqir i Spartak Moskës, derisa me po të njëjtin rezultat ka fituar edhe Werder Bremen ndaj Bragës.
Ekipi rus që ishte mysafir i Marseillet, u mbajt mirë në pjesë të parë, por pjesa e dytë dëshmoi se francezët ishin ekip më i mirë. Goli i parë i vendasve erdhi përmes Cheyrou (62’), ndërsa shumë shpejt u pasua nga një gol tjetër i shënuar nga Taiwo (68’). Niang vulosi rezultatin 12 minuta para fundit të ndeshjes (79’).

Edhe Werder Bremen ka shënuar fitore, megjithëse ca me fat, ndaj portugezëve të Bragës. Tre golat e vendasve i shënuan Naldo (4’), Jensen (27’) dhe Almeida, në kohën shtesë të ndeshjes (90’). Por mysafirët kishin dy penalti, dhe që të dyja u humbën nga Linz (10’) dhe Jorginho (36’), duke i lejuar ekipit gjerman një avantazh mjaft pozitiv edhe për ndeshjen e kthimit.

Nga ndeshjet tjera të së mërkurës, fitore ka shënuar edhe Everton si mysafir i ekipit Brann, derisa Villarreal është mposhtur me rezultat minimal 1-0 në fushë të ekipit rus Zenit.