Waldner: Jam realiste për qëndrimet e kundërta BE-Rusi për Kosovën

Komisionerja evropiane për Politikë të Jashtme, Benita Ferrero Waldner, ka deklaruar të mërkurën se - mbetet realiste kur bëhet fjalë për përafrimin e qëndrimeve me Rusinë për statusin e Kosovës. Waldner e bëri këtë deklaratë pak para takimit të treshes evropiane me delegacionin rus, që do të zhvillohet në afërsi të Kranjit, në Slloveni.
"Do të dëshiroja që me palën ruse t’i përafronim qëndrimet, por jam realiste”, ka thënë Waldner para arritjes në Kranj të Sllovenisë, ku do të zhvillohet takimi BE-Rusi, ndërsa pritet që çështja e Kosovës të jetë temë kryesore e takimit.

"Qëndrimi i BE-së është se, statusi i tashëm i Kosovës është i paqëndrueshëm dhe se kemi nevojë për një zgjidhje të përhershme”, ka thënë ajo – për të shtuar se –përkundër qëndrimeve të kundërta të Brukselit dhe Moskës, është e bindur se dialogu në mes të dy palëve do të vazhdojë.

Ndërkaq ministri i Jashtëm i Sllovenisë, Dimitrij Rupel, ka deklaruar se "ende nuk e dimë se çfarë do të ndodhë lidhur me Kosovën”.

“Kemi disa informata të caktuara, parashikime të caktuara, por tash për tash agjë nuk mund të thuhet”, ka thënë Rupel para takimit me delegacionin rus.

I pyetur nëse në këtë takim mund të zbuten mospajtimet në mes të BE-së e Rusisë lidhur me Kosovën, ai ka thënë se, “ndoshta, BE-ja dhe Rusia do të ‘pajtohen paraprakisht’ rreth kësaj çështjeje”.

Krahas komisionares Valdner, delegacionin e BE-së do ta përfaqësojnë Dimitrij Rupel dhe Javier Solana, ndërsa delegacioni rus udhëhiqet nga shefi i diplomacisë ruse, Sergei Lavrov.