Burns: Zbatimi i Planit Ahtisaari i domosdoshëm për paqe në Ballkan

Ndihmës-sekretari amerikan i Shtetit, Nicholas Burns, ka deklaruar se shpreson që pushteti në Beograd do të kuptojë se zbatimi i planit për pavarësinë e mbikëqyrur të Kosovës është i domosdoshëm për paqe në Ballkan.
"Shpresojmë se qeveria serbe do të kuptojë se ky ndryshim është i domosdoshëm dhe se nuk duhet anuar kah provokimet, e sidomos jo kah dhuna”, ka thënë Burns në Shoqatën e shtypit të huaj në Londër.

Siç shkruan në faqen e Departamentit të Shtetit, Burns ka potencuar se shqiptarët e Kosovës dhe liderët e tyre kanë për obligim që serbëve dhe të gjitha pakicave në Kosovë t’iu dërgojnë ‘sinjalet e duhura”.

Burns ka thënë se nuk beson që pavarësia e Kosovës do të hapë Kutinë e Pandorës dhe ka shtuar se SHBA-të, shumica e shteteve evropiane dhe të botës kanë përkrahur Planin e Ahtisaarit.