Të gjithë kemi nxjerrë mësimet e nevojshme

Të gjithë kemi nxjerrë mësimet e nevojshme

Në përvjetorin e ngjarjeve të 10 shkurtit, si ish-kryeministër dhe qytetar i Kosovës dëshiroj të shpreh edhe njëherë ngushëllimet dhe ndjenjat me të thella të respektit për familjet Balaj dhe Xheladini, të cilët humbën bijtë e tyre në këto protesta. Po ashtu dua t’i falënderoj këto familje edhe për dinjitetin dhe burrërinë me të cilën përballuan këtë dhembje.

10 shkurti ka qenë momenti më i vështirë gjatë periudhës sime si kryeministër. Unë, në kuadër të kompetencave të mia, kam bërë të gjitha përpjekjet që këto ngjarje të zbardhen dhe drejtësia të vihet në vend. Fatkeqësisht, edhe pse dihen përgjegjësit për këto ngjarje - policët rumunë, ata janë larguar nga Kosova pa marrë dënimin e merituar.

Bashkësia ndërkombëtare e ka për obligim që të zbardhë deri në fund këtë rast dhe të vëjë në vend drejtësinë. Edhe institucionet vendore duhet të bëjnë presionin e duhur për ta çuar deri në fund këtë çështje. Fajtorët nuk duhet të mbesin pa ndëshkuar.

Bashkësia ndërkombëtare duhet të jetë e kujdesshme që në misionin e ri që do të instalohet në Kosovë të mos përfshijë kontingjente, të cilat nuk respektojnë ligjin dhe ikin nga drejtësia.

Përvjetori i protestave të 10 shkurtit po ndodh në një moment të rëndësishëm historik - në kohën kur Kosova po bëhet gati të shpallë pavarësinë e saj. Edhe Lëvizja “Vetëvendosje”, edhe 2 djem të Kosovës: Arbeni dhe Moni, kanë dhënë kontribut për këtë ditë dhe është historia ajo që do të vlerësojë realisht rolin e tyre.

Unë besoj thellësisht se të gjithë ne, institucionet e Kosovës, bashkësia ndërkombëtare dhe Lëvizja “Vetëvendosja”, kemi nxjerrë mësimet e nevojshme dhe ngjarje të tilla tragjike nuk do të përsëriten kurrë më.

(Autori është ish-kryeministër i Kosovës ndërsa kjo deklaratë e tij është lëshuar në përvjetorin e protestave të 10 shkurtit 2007. Titulli është i redaksisë Telegrafi)