Publikohet lista e zezë e BE-së për Maqedoninë

Publikohet lista e zezë e BE-së për Maqedoninë

Bashkimi Evropian ka publikuar "listën e zezë" të reviduar për Maqedoninë me emrat e personave që janë të padëshirueshëm për BE-në dhe që paraqesin kërcënim për paqen në rajon, njofton agjencia e lajmeve INA.
Në listën e këtij viti të BE-së janë hequr dy emra, ndërsa janë shtuar tre emra të rinj, me ç`rast numri i përgjithshëm arrin në 17 veta, të cilët siç theksohet kanë punuar kundër Marrëveshjes së Ohrit, multietnicitetit dhe integritetit territorial të Maqedonisë.

Në listën e zezë të BE-së nuk janë ish-gjenerali i njësisë policore “Luanët”, Goran Stojkov dhe Ramadan Shiti, i cili u vra në aksionin policor në Brodec. Në listën e re si emra të rinj janë shtuar, Habib Ahmeti, i cili këto ditë ishte në qendër të vëmendjes nga publikimi i një video-xhirimi në stacionet e policisë, Fatos Alija dhe Zaim Halili, të tre të arrestuar.

Në listën e zezë evropiane vazhdojnë të mbeten deputeti i PDSH-së, Daut Rexhepi, ish-komandanti i UÇK-së, Agim Krasniqi, lideri politik i AKSH-së, Gafurr Adili, Lirim Jakupi, Idajet Beqiri, gjenerali shqiptar Spiro Butka, Xhemail Iseni, Avdil Jakupi, Naser Misimi, Shukri Aliu, Sait Rushiti, Emrush Suma dhe Sami Ukshini.

Bashkimi Evropian për çdo vit e revidon listën e zezë për personat e padëshiruar dhe që paraqesin kërcënim për procesin e paqes në Maqedoni dhe rajon. /INA/