Neville: Do të kthehem së shpejti

Neville: Do të kthehem së shpejti

Kapiteni i Manchester United, Gary Neville, ka zbutur shqetësimet se problemet e tij me lëndimet mund të çonin në largim më të hershëm të tij nga futbolli.
Mbrojtësi, i cili këtë muaj do të mbushë 33 vjet, nuk ka luajtur në ekipin e parë për 11 muaj, pasi që pësoi lëndim në gju gjatë ndeshjes me Bolton Wanderers, në marsin e vitit të kaluar.

“Fakti që kam qenë jashtë për një kohë të gjatë, solli edhe spekulimet se mund të mos kthehem më në fushë. I kuptoj këto. Por, gjuri im ka qenë në rregull gjatë muajve të fundit, po stërvitem sërish dhe jam i fokusuar në rikthimin e formës. Megjithatë, nuk do të caktoj ndonjë kohë kur do të kthehem”, ka thënë Neville.

Manchester United dje pësoi humbje 2-1 nga rivali i qytetit, Manchester City, duke rrezikuar t’i largohet në pesë pikë liderit, Arsenalit, nëse ky i fundit shënon fitore në ndeshjen e sotme përballë Blackburnit.